Luke 4
Seitan, Yesu iruyaghai.
(Mat 4:1-11; Mak 1:12-13)
1Kanuma Vovokaravina, Yesu itowatepani ma ivi nowei da Jodan okowina ivoterei inae ku dobu makiiwapana ma ivivi siya, 2imakamakai da mara 40 ikovi. Ma ke ita kamkam kubiine na damonai vitonara ikarai. Ma nani kamonai Devil ipisi da ita ruyaghai.3Ivona bo, “Tam God Natuna, bo? Kevona da weni wakimina ini parawa.”
4Ma Yesu ivonapotei bo, “Giruma katamana evonavona bo, ‘Wawaya ke parawa kava tepanai ina makai.’ ” a
5Ma Devil, Yesu ivi nowei da ku gawara sago ighe kirakai nake da dobu kudubina ivi beyei, 6ma ivonei bo, “Kudubina rapekuwai. God ku imaku iterei da aku kayowanai wawaya ana verei. 7Kuna vokavakavariku na rewapana ma kadara kudubina dobuwai ana verem da kuni badei.”
8Ma Yesu ivonapotei bo, “Giruma katamana evonavona bo, ‘Am Bada God ina kina kava kevokavakavari ma kevotekatekei.’ ” b
9Ma Devil, Yesu ivi nowei da inae ku Jerusalem ma ku Taparoro Numana vovona ighae. Ma ivonei bo, “Tam God Natuna, bo? Ketawem, 10iyamna giruma katamana evonavona bo, ‘God ina aneya ina vonesi da ina koyagha bubunim 11ma ina vokemim da ke wakima kuna takurei.’ ” c
12Ma Yesu ivonapotei bo, “Ma bade evonavona bo, ‘Bada God ke kona rubui.’ ” d
13Ma Devil, Yesu iruyaghai ikovi na ikuyowei inae. Inotai da mara sago taraboga biibiina ita panani da ita vovirame.
Yesu ina biga ivi karei Gariri kamonai.
(Mat 4:12; Mak 1:14-15)
14Yesu ivovirame ku Gariri ma Kanuma Vovokaravina gwabinai na ivi rewapana kirakai. Ma varana ikiibau da dobu ikiimumui. 15Ma i kiki numasi kamosiyai ivivi beyebeyena ma wawaya peyarisi ivivi ghegheni.Nasaret damsi Yesu ibarei.
(Mat 13:53-58; Mak 6:1-6)
16Mara sago Yesu inae ku Nasaret, ina ku dobu. Ma ikikava mara nonowa iberaberai na viyakam maranai irui ku kiki numana. Ma ivomiiri da iti yava ma 17wawaya sago ipisi da Aisaya ina giruma iverei. Ivotataghi ma kamonai giruma sago ipanani da ivi yavi, ivona bo,18“Bada kanumina gwabikuwai,
Iyamna ivineku da wawaya moyamoyakisi kurisi varana biibiina ana dimei.
Ivonataweku da iyavo kava gabura kamonai na ana rumamara kurisi da gabura ina kiibutawei.
Ma matapotapotasi kurisi ana rumamara da ina kita.
Ma bade iyavo kava wawaya ikayotiranesi da i nota ipeku na ana votawesi.
19Aiyonayona da karako marana vaghata ipisi da Bada ina wawaya ini yawasisi.” e
20Yesu ivi yava ikovi na girumina ivonokui ma giruma kana koyakoyagha wawayina iverei. Muriyai ivi kiimakiiyei. Ma wawaya kudubisi kiki numana kamonai ikitakita bogai 21ma Yesu sisiya ivi karei. Ivonesi bo, “Karako weni girumina kovi yanei na vonavaghata, marana inekiibau.”
22Muriyai sisiya ghamaghamasi itere bubuni da wawaya peyarisi ivi deyei ma ikawabiibiiyei. Ma kegha da, muriyai wawayisi ivona bo, “Te! Ikikava da nakanani isisiya? Wena na Josepa natuna.”
23Ma Yesu ivonesi bo, “Anotanotai da weni miibiina kota voneku, kota vona bo, ‘Yaboyabo kevi yawa meyem. Bera ghamaghamasi Kapeniyam kamonai kuberai na sisiyina kavi yanei. Mede tam mani am kwanatu kamonai berasi keberai da kana kitai.’ 24Vonavaghata avonavonemi, God ina peroveta na tuna mani ina dobuwai wawaya ke ina vokaravei. f 25Kota notai da peroveta Elaidiya ina mariyai kwapukwapura moyamoyakisi ipeyari kirakai Israel kamonai ma ke sago iti vitesi. Nani maranai gomara ghamana itupuwa iyamna madegha aroba ma nawaravi miikovimasago na garewa kegha. 26Ma God, Elaidiya ivonatawei da Israel ikiibutawei inae ku Zarepata kwanatuna Saidon kamonai da kwapura sago nani dobunai ivi vitei. g 27Ma bade peroveta Elaisiya ina mariyai wawaya ipeyari kirakai Israel kamonai gubaga sago kana vava giipo gwabisiyai ma ke sago kamosiyai iti yawasi. Tomowa sago kava ivi yawasi ma tuna na Siriya tomowa Neiman.” h
28Yesu weni nakanani ivivi sisiya ma iyavo kava kiki numana kamonai ivi yanei na nuwanuwasi ipughu kirakai. 29Ivomiiri ma Yesu ivotabitabiri da kwanatu ikiibutawei. Ma inae ku koya kiiyagirina tawanoruwena kubiine. 30Ma Yesu koroto kamosiyai ionagha da inae.
Yesu kanuma berona ikwavini.
(Mak 1:21-28)
31Yesu Nasaret ikiibutawei ioru ku Kapeniyam, tuna kwanatu sago Gariri kamonai. Ma viyakam maranai ivi karei da wawaya kurisi ivivi beyebeyena. 32Sisiya ghamaghamasi iterei da wawaya ivi deyei, iyamna ina vibeyebeyena na ere rewapanina. i 33Ma kiki numana kamonai tomowa sago imakamakai, ma kanuma berona gwabinai irunuma. Ma ikiirara, 34ivona bo, “Aaa! Tam Yesu, Nasaret wawaya, avi kuna berai kurikai? Kupisi da kuna gwaramutukai, bo? Avogiinim da tam na God ina Wawaya Vovokaravim.”35Ma Yesu iyeghai, ivona bo, “Kawam epota! Tomowina kekiibutawei!” Ma koroto maghinosiyai kanuma berona tomowina itawei ku tano ma ikiibutawei inae. Ma tomowina na ke sago gubaga ita panani.
36Wawaya peyarisi ivi deyei ma ti mani kamosiyai ivona bo, “Te! Ikikava da weni nakanani ibeyebeyena? Ma bade rewapana gwabinai da sisiya bagibagisi etereterei na kanuma beroberosi evovotekatekei ma ekiikiibau.” 37Ma Yesu varana ikiibau da dobu ine yavui.
Yesu wawaya peyarisi ivi yawasisi.
(Mat 8:14-17; Mak 1:29-34)
38Yesu kiki numana ikuyowei ma inae Saimon ina ku numa. Ma Saimon rawana wavinena igubaga, ininina imuyamuya kirakai ma wawaya Yesu ivona tovoni da iti vitei. 39Imiiririya wavinena kurina ma muyamuyana iyeghai da ikiibukuyowei ma iyawasa. Ma yaghiyaghinai ivomiiri da ikoyagha bubunisi.40Ravi ipika na wawaya peyarisi turaturasi gubagubagisi, kii gubaga bogii ma bogiiyai na ikavarapiyesi Yesu kurina. Ma sago sago duma imana ku tepasi iterei da ivi yawasisi. 41Ma bade, kanuma beroberosi ikwavikwavinisi da wawaya peyarisi ikiikiibutawesi. Ma kanumisi ere kiikiirarisi ivonavona bo, “Tam God Natuna!”
Tuna kubiine iyeghisi ma ivonatanisi da ke iti sisiya, iyamna ti na iakovi da Yesu na God ina Vivinevine Wawayina.
Yesu kiki numana kamonai idima.
(Mak 1:35-39)
42Mara tomtomwai na Yesu ikiibau ku dobu makiiwapana. Ma wawaya peyarisi Yesu iekwekwai da ipanani ma i kayowana da gwabisiyai iti tinatani da ke ita kuyowesi. 43Ma ivonesi bo, “Kegha, ana nae da kwanatu viya kamosiyai God ina vikiivavona varana biibiina ana dimei, iyamna tuna bigana kubiine God ivonataweku.”44Ma vaghina, Judiya dobuna ine yavui da kiki numasi nununai idimadima.
Copyright information for
PWG